వెలంటైన్స్ శుభాకాంక్షలుంటయని ఒచ్చి నీరుగారే సోదర సోదరీమణులందరు క్షమించాలె. ‘వెలంటైన్స్ డే’ పుట్టు పూర్వోత్తరాలు చెప్పాల్సిన అవసరం కూడా లేదనుకుంటా ఎందుకంటే, కొద్దో గొప్పో ఈ పాటీకి మనకు తెల్వకుంటనే మన మెదడులకి ఆ సమాచారం ఎప్పుడో చేరింది. ఇదంతా మార్కెటింగ్ మహిమ అనాలో లేక, కార్పొరేషన్ల కుట్ర అనాలో మీకే వదిలేస్తున్న.

ఒక్క సారి ‘వెలంటైన్స్ డే’ గురించి కొన్ని నిజాలు చెప్పి పోదామని ఒచ్చిన (మీకు ఇదివరకే తెలిసి ఉండొచ్చు, తెల్వని వాల్లకు చెప్దామని ! :). ‘గ్రీటింగ్ కార్డ్ అసోసియేషన్’ వాల్ల అంచనను బట్టి, ‘వెలంటైన్స్ డే’ సందర్భంగ సంవత్సరానికి ఒక బిలియన్ (వంద కోట్లే గద!) కార్డులు అమ్మకమైతయి. క్రిస్మస్ తరువాత ‘వెలంటైన్స్ డే’ కే ఆ ఘనత దక్కుతది, (క్రిస్మస్ అప్పుడు 2.6 బిలియన్ అంట). 85% ‘వెలంటైన్స్ డే’ సరంజామాల కొనుగోలుదారులు మల్ల స్త్రీ లే నంట, ఇది తెలిసినంక మార్కెటింగ్ వాల్ల కపట మస్తిష్కాల్ల ఎన్ని కుత కుతలో?

ఒక్క కార్డుకు సగటున 5 డాలర్లు ఏసుకున్నా (ఒక్కో కార్డు 0.5 – 10 డాలర్లు ఉంటుంది అన్న, ‘గ్రీటింగ్ కార్డ్ అసోసియేషన్’ వాల్ల అంచనను బట్టి), ‘వెలంటైన్స్ డే’ గ్రీటింగ్ కార్డ్ ల అమ్మకాల మీద సంవత్సర ఆదాయం దాదాపు 500 కోట్ల డాలర్లు / 22000 కోట్ల రూపాయిలు (అంతేనా !). అయితె ఈ అంకెలొచ్చి అమెరికాలవి మాత్రమే. ప్రపంచ వ్యాప్తంగ ఎంత సొమ్ము చేస్కుంటున్నరో ఆలోచించండి? అయితే ఈ ఆదాయం ఒక్క గ్రీటింగ్ కార్డుల మీద మాత్రమే ఇంత ఉంటే మిగితా (టెడ్డి బేర్లని, పర్ఫ్యూమ్లు, వగైరా వగైరా…) సరుకు సరంజామలతోటి ఇంక ఎన్ని లక్షల కోట్ల ఆదాయమో ఒక్క సారి ఆలోచించండి.

ఇవ్వన్నీ లెక్కలు ఎందుకు చెప్తున్నడు, పొద్దున్నే తాగొచ్చిండా వీడు? అంటె… నేను కాలేజీ రోజుల నుండి అమ్మయిలు ఎవరు ‘ఊ’ అంటరా ఓ గులాబి పువ్వో, కార్డో (తెలుపు, గులాబీ కాదు… పచ్చది అంతకన్న కాదు) ఇద్దామని ఉత్సాహ పడ్డోన్నే. [ఇంకా పడుతున్నరా ! అని అడుగుదామనుకుంటే. లేదు భయ్! ఒక నాలుగేళ్ల కిందనే నా ప్రేమ ఫలించింది కాబట్టి ఇప్పుడు ఆ చాన్స్ లేదన్నట్టే. చాన్స్ లేదు కాబట్టేనా ఈ (వెలంటైన్స్) గీతా బోధ అనుకోవొద్దు]. ఇప్పుడు ఇవ్వాల్సిన అవసరంలేదు కాబట్టి ఆలోచిస్తున్ననా.. ఏమో! మొత్తానికి ఆలోచన వచ్చి కొంచం శోదిస్తె తెలిసిన విషయాలే మీతో పంచుకుందామని వచ్చిన.

ఖర్చు పెట్టె వాడి ఇష్టం.. అంటె అది సరైనా సమాధానం కాకపోవొచ్చు. అమెరికాలో ఉంది అట్లా మన దగ్గర లేదు అని అనుకునే అవకాశమే లేదు. ఎందుకంటే 1980లోనే ప్రపంచీకరణకు మన దేశం తలుపులు తెరుచుకొను కూర్చున్నది (పూర్తిగా అటుదిక్కు వెల్లకుంట మాట్లాడుకుందాం :), చివరి పదేల్లల్ల, సినిమాల భూతం చాలదన్నట్టు ‘వెలంటైన్స్ డే’ కూడ మన ధేశంల దాపురించింది. కంపనీలకు కావాల్సింది, లాభాలు ! వాటి కోసం రేపు తద్దినాలను కూడ మార్కెట్ చేసినా దిక్కులేదు. ఇప్పటి వ్యవస్థల అమెరికా ఏంచేసినా, అక్కడ ఏం జరిగినా ప్రపంచ వ్యాప్తంగ అందరు అనుభవించాల్సి వస్తది (ఇప్పుడు సుఖాలైనా, రేపు మాత్రం దుఃఖాలే !)

[ఇక్కడ చిన్న విషయం చెప్పలె, ఎప్పుడొ ఒక ఆడ్ చూసింది గుర్తొచ్చింది, “మీరు, చనిపోయినంక మీరు ఇష్టపడె విధంగ, కావల్సినంత ఖర్చుపెట్టి మీ వాళ్ళు మీకు ఫ్యూనరల్ చెయ్యలేక పోవొచ్చు. ఇప్పటి నుండె మీరు నెలకు అతి తక్కువ రుసుము చెల్లిస్తే 5000 నుండి 10,000 డాలర్ల ఫ్యూనరల్ పాకేజీను మీ సొంతం చేస్కోండి” అని. బతికి ఉన్న వాల్లకు చావును మార్కెట్ చేస్తున్నరు. రేపు కాక పోయినా ఇట్లాంటియి ఇంకో 10-20 సంవత్సరాల్ల, మన దేశంల కూడ చూస్తమేమో]

ఇష్టమైన వాల్ల మీద ప్రేమ వ్యక్తపరచాలంటె వాల్లకు కార్డులు / కానుకలు కొనాల్సిన అవసరంలేదు., అది కూడా సంవత్సరంల ఒక్క రోజు చెప్పేస్తే అయిపోతదా? అరగంట కాక పోయినా రోజుకు ఒక 5 నిమిషాలన్నా (పెల్లయిన వాల్లు / ప్రేమికులు) మీ సహచరులను ఒడిలోకి తీసుకుని ఎంత ప్రేమిస్తున్నారో వ్యక్త పరచండి అంతే చాలు. సంవత్సరం మొత్తం వంటింటి కుందేలు లెక్క చూసి ఈ ఒక్క రోజు పువ్వులో చాక్లెట్లో కొనిచ్చినంత మాత్రాన ఆ గుండె నిండది.

Once again, Happy Valentines Day !

(రెండో భాగం చదవండి)

PS: if you’re, curious ‘Anti-Valentine’s Day’ for more

* ‘వెలంటైన్స్’ అన్నా ‘వాలెంటైన్స్’ అన్నా, దానికొరిగేదేమి లేదనుకుంట, దాన్ని కాష్ చేస్కునే వాల్లు ఎట్ల చేస్కోవాలనుకుంటె అట్ల చేస్కుంటరు.